काठमाडौं- भारतीय सेनाका इन्जिनियरहरुले श्रीलंकामा १ सय फिट लामो बेलीब्रिज निर्माण थालेका छन् । श्रीलंकाको केन्डी क्षेत्रमा भारतीय सेनाका इन्जिनियरहरुले १ सय फिट लामो बेलीब्रिज निर्माण थालेको श्रीलंकास्थित भारतीय उच्चायुक्तको कार्यालयले जानकारी दिएको छ ।

सामाजिक सञ्जालमा पोस्ट गर्दै कार्यालयले यस बेलीब्रिजले श्रीलंकाली सडक सञ्जालको बी ४९२ राजमार्गमा सवारी आवागमनमा सहजता ल्याउने अपेक्षा गरिएको जनाएको छ ।

डिट्वा नामक समुद्री आँधीले प्रभावित भएको श्रीलंकालाई सहयोग गर्न भारतले सञ्चालन गरेको अपरेशन सागर बन्धुअन्तर्गत उक्त पुलको निर्माण गरिएको भारतीय समाचार संस्था एएनआईले जनाएको छ । उच्चायुक्तको कार्यालयले श्रीलंका सडक विकास प्राधिकरणलाई सहयोग गर्नका लागि अन्य कार्यहरु पनि जारी रहेको जानकारी दिएको छ ।

गत डिसेम्बर महिनामा श्रीलंका भ्रमणका क्रममा भारतीय विदेशमन्त्री एस जयशङ्करले श्रीलंकासामु ४५ करोड अमेरिकी डलर बराबरको सहायता प्याकेज प्रस्ताव गरेका थिए । उक्त रकम श्रीलंकाको पुननिर्माणका लागि खर्च गरिने उनको प्रस्ताव थियो ।