काठमाडौं- भारत विश्वकै सबैभन्दा ठूलो धान उत्पादक मुलुक बन्न सफल भएको छ । चीनलाई पछि पार्दै भारत सबैभन्दा ठूलो धान उत्पादक मुलुक बन्न सफल भएको भारतीय कृषिमन्त्री शिवराज सिंह चौहाणले जनाएका छन् ।

भारतले कुल १५ करोड टन धान उत्पादन गरेको उनको भनाइ छ । २५ किसिमका अन्नका विभिन्न १ सय ८४ नयाँ प्रजाति सार्वजनिक गर्दै मन्त्री चौहाणले नयाँ प्रजातिको अन्नले राम्रो उत्पादन दिने र किसानको आयमा वृद्धि गर्ने अपेक्षा गरिएको बताए ।

उनले यी नयाँ प्रजातिका अन्न सक्दो छिटो किसानको पहुँचमा पु¥याउन पनि मन्त्रालयका अधिकारीलाई निर्देशन दिए । भारतीय कृषि अनुसन्धान परिषद्ले ती अन्नको विकास गरेको द हिन्दू बिजनेसलाइनले जनाएको छ ।

चौहाणका अनुसार सन् २०१४ मा सत्तामा आएयता नरेन्द्र मोदी नेतृत्वको सरकारले हालसम्म ३ हजार २ सय २६ किसिमका उन्नत जातका अन्नको उत्पादनलाई स्वीकृति प्रदान गरेको छ । सन् १९६९ देखि सन् २०१४ सम्म यस्तो स्वीकृति पाउने अन्नका प्रजातिको सङ्ख्या ३ हजार ९ सय ६९ रहेको थियो ।