काठमाडौं- भारतको केन्द्रीय बैंकले मुद्रास्फीति दरको लक्ष्य ४ प्रतिशतमा कायम राख्ने भएको छ । मुद्रास्फीति दर ४ प्रतिशत निर्धारण गरिएपनि दुईदेखि छ प्रतिशतसम्म हुनसक्ने अपेक्षा गरिएको छ ।

भारतको केन्द्रीय बैंक रिजर्भ बैंक अफ इण्डिया आरबीआईले यस्तो लक्ष्य हरेक पाँच वर्षमा निर्धारण गर्दै आएको छ । रोयटर्सका अनुसार अबको अध्यावधिक अवधि आगामी मार्चमा सकिँदैछ ।

यसबारे भारतको वित्त मन्त्रालयले टिप्पणी गर्न अस्वीकार गरेको रोयटर्सले उल्लेख गरेको छ । यसअघि सेप्टेम्बर महिनामा पनि रोयटर्सले मुद्रास्फीति लक्ष्य ४ प्रतिशत कायम राख्नेबारे आरबीआईले विचार गरिरहेको समाचार सार्वजनिक गरेको थियो ।

भारतले मुद्रास्फीति लक्ष्यको रुपरेखा सन् २०१६ मा लागू गरेको थियो । यो रुपरेखा सन् २०२१ मा परिमार्जन गरिएको थियो । सो लक्ष्य हासिल गर्ने जिम्मेवारी आरबीआईलाई दिइएको छ ।