काठमाडौं – विश्व फुटबलकै सबैभन्दा चर्चित प्रतिस्पर्धा एल क्लासिको अन्तर्गत बार्सिलोना र रियल मड्रिड आज आमनेसामने हुँदैछन् । स्पेनिस सुपर कप २०२६ को फाइनलका रूपमा हुने यो खेल साउदी अरबको जेद्दाहस्थित किङ अब्दुल्लाह स्पोर्ट्स सिटी स्टेडियममा नेपाली समयअनुसार राति पौने १ बजे सुरु हुनेछ।

यो खेललाई लिएर दुवै टोलीमा उच्च तनाव र उत्साह देखिएको छ। पछिल्लो समय मिश्रित प्रदर्शन गरिरहेको रियल मड्रिड अहिले दबाबमा देखिएको छ ।

बार्सिलोनाले गत सिजन सुपर कप फाइनलमा रियल मड्रिडलाई पराजित गर्दै उपाधि जितेको थियो। त्यसको निरन्तरता दिने लक्ष्यसहित बार्सिलोना मैदान उत्रने छ।

प्रशिक्षक हान्सी फ्लिकले आफ्नो टोली आत्मविश्वासमा रहेको बताएका छन् । रियल मड्रिडका गोलरक्षक थिबाउट कोर्टुवाले पनि एल क्लासिको केवल खेल मात्र नभई प्रतिष्ठा र उपाधिको लडाइँ भएको बताएका छन्।