दोलखा– जिल्लाको वैतेश्वर गाउँपालिकाको आयोजनामा सञ्चालित  वडा स्तरीय शिक्षक-कर्मचारी भलिबल प्रतियोगिताको उपाधि वैतेश्वर गाउँपालिकाको कर्मचारी टिमले हात परेको छ ।

शनिबारदेखि वैतेश्वर माध्यमिक विद्यालयको खेलमैदान नाम्दुमा सुरु भएको प्रतियोगितामा सहभागी १० टिमलाई पछि पार्दै आयोजक वैतेश्वर कर्मचारी टिमले उपाधि जितेको हो । विजेता पालिकाले नगद ३० हजार रुपैयाँसहित शिल्ड-मेडल उचाल्न सफल भएको हो ।

त्यसैगरी प्रतियोगितामा वडा नम्बर-२ को शिक्षक टिम उपविजेता बन्दै नगद २० हजार सहित दोस्रो शिल्ड उचाल्न सफल भएको छ ।
प्रतियोगिता वडा नम्बर-३को शिक्षक भलिबल टिम तेस्रो बन्दै नगद १० हजार हातपार्न सफल भएको छ भने, प्रतियोगिता वडा नम्बर-१ को शिक्षक भलिबल टिमले सान्त्वना स्थान हासिल गर्दै नगद ५ हजार जितेको छ ।

प्रतियोगितामा वैतेश्वरका ८ वडाका माध्यमिक सामुदायिक विद्यालयका ८ वटा शिक्षक टिम र आयोजक गाउँपालिका-२ वटा कर्मचारी टिम सहभागी थिए ।

प्रतियोगितामा प्रथम, दोस्रो, तेस्रो र सान्त्वना हुने खेलाडीहरुलाई वैतेश्वर गाउँपालिका वडा अध्यक्षहरु असोक तामाङ,श्यामकुमार घिसिङ कमल अधिकारी र जिल्ला खेलकुद विकास समिति दोलखाका अध्यक्ष आशिष घिसिङ लगायतले पुरस्कार वितरण गरेका थिए ।

पालिका भित्रका शिक्षक-कर्मचारी बीचको सम्बन्ध थप परिचयात्मक बनोस् भन्ने उद्देश्यले आयोजना गरिएको प्रतियोगिताले राष्ट्रसेवक कर्मचारी र शिक्षक बिचको सम्बन्धलाई थप सकारात्मक तथा मजबुत बनाउने बताए ।

खेलाडी उत्पादन गर्ने मुख्य थलो नै विद्यालय भएकाले शिक्षकहरूलाई खेलकुद कार्यक्रममा जोडेर आफ्ना विद्यालयबाट विद्यार्थी खेलाडी उत्पादन गर्न टेवा पुगोस् भन्ने उद्देश्यले पनि शिक्षक-कर्मचारी भलिबल कार्यक्रम आयोजना गरिएको वैतेश्वर गाउँपालिका प्रवक्ता श्यामकुमार घिसिङले बताए । सुवाश बस्नेत/दोलखा