काठमाडौं – दिनेश राउत निर्देशित फिल्म प्रचारका लागि सांगीतिक टूर गरिने भएको छ । निर्माण पक्षले बिहीबार दरबार मार्गमा एक कार्यक्रमको आयोजना गरी टुर घोषणा र यसबारे जानकारी दिएको हो ।

देशका पाँच मुख्य शहरमा सांगीतिक टुर हुने निर्माण पक्षले बताएको छ । गायक केहरसिंह लिम्बू र उनको ब्यान्ड ‘केहर एन्ड लुङ्गा’ले सांगीतिक प्रस्तुती दिनेछन् । त्यस कन्सर्टमा फिल्मका नायक अविभेषक खड्का र नायिका आकृती राजभण्डारी पनि उपस्थित हुनेछन् ।

माघ १ गते नेपालगञ्ज, माघ ३ गते पोखरा, माघ ६ गते चितवन, माघ ९ गते काठमाडौं र माघ १७ गते दमकमा कन्सर्ट हुने तय भएको निर्माण पक्षले बताएको छ । यी सबै कन्सर्टको प्रवेश शुल्क नलाग्ने बताइएको छ ।

काठमाडौंको कन्सर्टमा फिल्मको ट्रेलरसमेत सार्वजनिक गरिने जनाइएको छ ।

‘कुमारी’मा समावेश चार गीत ‘डोको बुन्ने’, ‘तिमी बिना’, ‘कता छौं मेरो फूल’ र ‘झ्यालैमा’मा केहरको स्वर रहेको छ ।

यी चारै गीतले युट्युबमा राम्रो भ्युज पाएका छन् ।