काठमाडौं- राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राष्ट्रिय स्वतन्त्र पार्टीका सभापति रवि लामिछानेलाई उनको निवासमै पुगेर भेटेका छन्।

दुई नेताहरूबीच बिहीबार बिहान भएको भेटलाई अर्थपूर्ण रुपमा हेरिएको छ। अध्यक्ष लिङ्देन आफैंले रविलाई भेटेपछि धेरैले चासोपूर्वक हेरेका छन् ।

यसबारे लिङ्देनले खबरहबलाई भने, ‘भेटमा अरू राजनीतिक कुरा भएन । पृथ्वी जयन्तीको निम्तो दिएर आएँ । वैकल्पिक शक्ति मिलाएर उहाँहरू अघि बढिरहनुभएकोबारे केही कुरा भयो। राजनीतिक सहकार्यबारे गहिरो कुरा भएको छैन, हामीबीच मनमुटाव पनि छैन।’

राप्रपाले हरेक वर्ष पुस २७ गते पृथ्वीनारायण शाहको जन्म जयन्ती मनाउँदै आएको छ। यही २७ गते पार्टीले बृहत् रूपमा पृथ्वी जयन्ती मनाउन लागेको छ।

राष्ट्रनिर्माता पृथ्वीनारायणको ३०३ औँ जन्मजयन्ती तथा राष्ट्रिय एकता दिवस मुलुकभर मनाइने प्रचलन छ। त्यसलाई राष्ट्रिय प्रजातन्त्र पार्टीले विशेष रूपमा मनाउने गरेको छ।

पुस २७ गते पुराना र नयाँ दलका शीर्ष नेताहरूलाई बोलाएर चियापान आयोजना गर्ने राष्ट्रिय प्रजातन्त्र पार्टीको तयारी छ।

आधुनिक नेपालको एकीकरणका नेतृत्वकर्ता शाहको योगदानको स्मरण गर्दै राप्रपाले यसवर्ष पनि कार्यक्रम आयोजना गरेको लिङ्देन बताउँछन्।