काठमाडौं– हेलिकोप्टर दुर्घटनामा ज्यान गुमाएका यति एयरलाइन्सका प्रवन्ध निर्देशक आङछिरीङ शेर्पाको आइतावर अन्त्येष्टि गरिने भएको छ ।

शुक्रवार विहान टिचिङ अस्पतालमा पोस्टमार्टमपछि परिवारलाई शव हस्तान्तरण गरिएको थियो । शवलाई आज विहान ८ बजेपछि टुँडिखेलमा श्रद्धान्जलीका लागि राखिनेछ ।

प्रहरी नायव उपरीक्षक फणिन्द्र प्रसाईले शेर्पाको आइतबार अन्तिम संस्कार गर्ने परिवारले बताएको जानकारी दिए ।

हेलिकोप्टर दुर्घटनामा निधन भएका अन्य ६ जनाको भने आजै अन्त्येष्टि गरिनेछ ।

दुर्घटनामा ज्यान गुमाएका संस्कृति पर्यटन तथा नागरिक उड्डयन मन्त्री रवीन्द्र अधिकारीको पोखरामा अन्त्येष्टि गरिनेछ भने दुर्घटनामा ज्यान गुमाएका नागरिक उड्डयन प्राधिकरणका उप महानिर्देशक वीरेन्द्र कुमार श्रेष्ठ, निर्देशक ई ध्रुव भोछिभोया, प्रधानमन्त्री तथा मन्त्रिपरिषद् कार्यालयका उपसचिव तथा प्रधानमन्त्रीका स्वकीय सचिव युवराज दाहाल, पाइलट प्रभाकर केसी र मन्त्री अधिकारीका पीएसओ समेत रेहका सुरक्षाकमी अर्जुन घिमिरेको आजै पशुपति आर्यघाटमा अन्त्येष्टि गरिने छ ।

टिचिङ अस्पतालमा आफन्तलाई शव जिम्मा लगाएपछि प्रहरी नायव उपरीक्षक फणिन्द्र प्रसाईले यति एयरलायन्सका प्रवन्ध निर्देशक आङछिरिङ शेर्पाको आइतबार अन्तिम संस्कार गरिने जानरकारी दिए ।