काठमाडौं- जलन उपचारका लागि मुलुकको अग्रणी कीर्तिपुर अस्पतालमा बिरामीका लागि शैय्या अभाव भएको छ । जलनका बिरामीका लागि छुट्याइएका ३५ शैय्या सबै भरिएपछि जनरल बेडमा राखेर उपचार गर्नुपर्ने अवस्था छ ।

त्यसो गर्दा पनि बेड नपाएर केही बिरामीले फर्किनुपरेको जलन उपचार अभियान्ता तथा समाजसेवी उज्ज्वल विक्रम थापाले जानकारी दिएका छन् । उनका अनुसार आइतबारसम्म विभिन्न जिल्लाबाट आएका ५० भन्दा बढी जलनका बिरामी अस्पतालमा भर्ना भएका छन् ।

सोमबार आएका थप बिरामीलाई भने बेडको अभावका कारण अन्य अस्पतालमा रेफर गर्नुपरेको थियो । खबरहबसँग कुरा गर्दै थापाले भने, “यो समस्या हरेक वर्ष दोहोरिन्छ । जलनका बिरामीको सेवामा लाग्दालाग्दै म आफैँ बूढो भइसकेँ, तर सुन्ने कोही छैन ।”

उनका अनुसार नयाँ आउने बिरामीलाई टिचिङ अस्पताल र वीर अस्पतालको बर्न वार्डमा जान सल्लाह दिइएको छ । बिरामी ढिलो गरी उपचारका लागि आइपुग्दा उपचार प्रक्रिया झन् जटिल हुने गरेको पनि उनले बताए ।

थापाका अनुसार जलनका बिरामीमध्ये ठूलो संख्यामा बालबालिका पर्ने गरेका छन् । आवश्यक पूर्वाधार र शैय्याको अभावले समयमै उपचार नपाउँदा बिरामीको ज्यान जोखिममा पर्ने अवस्था रहेको उनले चिन्ता व्यक्त गरे ।