अछाम- अछाममा एउटा विद्यालय परिसरबाटै किशोरी अपहरणमा परेकी छन्। जिल्लाकव बान्नीगढी जयगढ गाउँपालिकास्थित जयगढको सरस्वती माध्यमिक विद्यालय परिसरबाट कक्षा ७ मा अध्ययनरत १३ वर्षीया किशोरी अपहरणमा परेकी हुन्।

विद्यालयबाट घर फर्किन लागेकी उनलाई गत बिहीबार रामारोशन गाउँपालिका वडा नम्बर ७ निवासी ३५ वर्षीय सन्तोष ऐडी र उनकी पत्नी झरना साउँदले घर पुर्‍याइदिने भन्दै मोटरसाइकलमा हालेर लगेको खुलेको छ।

मोटरसाइकलमा चढाउने क्रममा किशोरीले रोइकराइ गरेर किशोरीले सहयोग पनि मागेकी थिइन् । घटनाबारे जयगढ प्रहरी चौकीलाई खबर गरिएको थियो । तर खोजीमा चासो नदिएको पीडित परिवारले जनाएको छ ।

बिहीबार साँझ नै प्रहरीलाई जानकारी गराए पनि किशोरीको अवस्था अज्ञात छ। घटनामा संलग्न रहेको आरोपमा सन्तोषकी पत्नी झरना साउँदलाई प्रहरीले नियन्त्रणमा लिएको छ।

जिल्ला प्रहरी कार्यालय अछामका डीएसपी ओमप्रकाश खनालले अपहरणकारीको पहिचान भइसकेकाले खोजी भइरहेको जानकारी दिएका छन्। झरना प्रहरी नियन्त्रणमा आए पनि सन्तोष र किशोरी भेटिएका छैनन् ।

घटनापछि किशोरीका परिवार तनावमा छन् । विद्यालयबाटै किशोरी गायब भएपछि स्नीयवासी त्रसित छन्। प्रहरीले पनि सूचना पाउनेबित्तिकै खोजी नगरिदिएको गुनासो परिवारजनले गरेको छ।