एजेन्सी- दिल्ली उच्च अदालतले सामाजिक सञ्जाल फेसबुक, गुगल, युट्युब र ट्वीटरलाई योग गुरु रामदेवविरुद्धका आपत्तिजनक भिडियो तथा सामग्री विश्वभर हटाउन आदेश दिएको छ ।

भारतका प्रयोगकर्ताका लागि मात्रै त्यस्ता आपत्तिजनक भिडियो सामग्रीहरु हेर्न प्रतिबन्ध लगाउनु उचित नभएकाले विश्वभरबाटै प्रतिबन्धका लागि यस्तो आदेश दिइएको न्यायाधीश प्रतिभा एम सिंहको तर्क छ । भारतमा मात्रै प्रतिबन्ध लगाउने हो भने सामाजिक सञ्जालमा रहिरहने त्यस्ता सामग्री प्रयोगकर्ताले अन्य कुनै माध्यमबाट हेर्न सक्ने अदालतको ठहर छ ।

आपत्तिजनक कुनै पनि भिडियो सामग्रीलाई विश्वभरमै रोक्नका लागि सामाजिक सञ्जालहरुलाई अदालतले आदेश दिएको हो ।

यसअघि सामाजिक सञ्जालका सम्बन्धित कम्पनीले आपत्तिजनक त्यस्ता सामग्रीको लिंक (युआरएल) भारतमा प्रतिबन्ध गर्न कुनै आपत्ति नहुने जनाउँदै विश्वभरका लागि भने त्यसो गर्न नसक्ने जवाफ दिएका थिए ।

अदालतले गत वर्षको सेप्टेम्बरमा रामदेवसँग सम्बन्धित पुस्तकमा लेखिएका मानहानिजनक अंश हटाउन आदेश दिएको थियो । ती आपत्तिजनक पुस्तकका अंश सामाजिक सञ्जालमा धेरैले पोस्ट तथा सेयर गर्दै आएका छन् ।