काठमाडौं – नेकपा एमालेका सचिव महेश बस्नेतले सरकारले पार्टी अध्यक्ष केपी शर्मा ओलीमाथि लगाइएको स्थानहद हटाउने संकेत सकारात्मक भएको प्रतिक्रिया दिएका छन् ।

शनिबार प्रधानमन्त्री निवास बालुवाटारमा भएको छलफलपछि सरकारले निर्वाचनको अनुकूल वातावरण बनाउन स्थानहद पुनरावलोकन गर्न सकिने संकेत दिएको हो।

यसपछि सचिव बस्नेतले सामाजिक सञ्जालमार्फत प्रतिक्रिया दिँदै मुख्य राजनीतिक दलका अध्यक्षमाथि स्थानहद लगाइनु उपयुक्त नहुने बताएका छन्। निर्वाचनलाई सहज र विश्वसनीय बनाउन यस्तो निर्णय लिइएको हो भने त्यसलाई स्वागत गर्नुपर्ने उनको भनाइ छ।

जेनजी आन्दोलनका क्रममा दमन गरिएको आरोपमा छानबिनका लागि गठित आयोगले ओलीलाई काठमाडौँ उपत्यकाबाहिर जान नपाउने गरी स्थानहद तोकेको थियो। तर पछिल्लो राजनीतिक संवादसँगै उक्त निर्णयमा लचकता देखिन थालेको छ।