काठमाडौं– बलिउडका सुपरस्टार शाहरुख खानले आफ्नो फ्लिम करिअरमा केही यस्ता पात्रको भूमिका निभाएका छन्, जसले आज पनि दर्शकलाई प्रभावित बनाउँछ । विशेषगरी ‘बाजिगर’ र ‘डर’ जस्ता ९० को दशकका थ्रिलर फिल्ममा उनले खलनायकको भूमिका निभाएका थिए । शाहरुख खानले निभाएको खलनायक पात्रको पनि छुट्टै फ्यानबेस छ । उनको यस्ता भूमिकाबाट दक्षिण भारतीय सुपरस्टार थलापथी विजय पनि निकै प्रभावित छन् ।

भारतीय मिडिया हेडलाइन टुडेसँगको अन्तर्वार्तामा उनले आफूलाई खलनायकको भूमिका खेल्न कुनै असहज नहुने बताए । यद्यपि यस्ता पात्र सशक्त र प्रभावशाली हुनुपर्ने उनको धारणा छ । शाहरुख खानले ‘बाजिगर’ वा ‘डर’मा देखाएको दमदार पात्र भए मात्रै आफू खलनायकको भूमिकामा देखिने उनको भनाइ छ ।

सन् १९९३ मा अब्बास–मस्तानको निर्देशनमा बनेको ‘बाजिगर’ मा शाहरुख खानले पहिलो पटक एन्टी–हिरोको भूमिका निभाएका थिए । अजय शर्मा नामक पात्रमार्फत उनले बदला र पहिचान परिवर्तनको कथा प्रस्तुत गरेका थिए । यसबाट उनको करियरमा ठूलो मोड आएको थियो । यस फिल्ममा काजोल र शिल्पा शेट्टी मुख्य भूमिकामा थिए ।

त्यसै वर्ष यश चोपडाको निर्देशनमा बनेको ‘डर : ए भायोलेन्ट लभ स्टोरी’मा पनि शाहरुखले एक अन्धो प्रेमी एवम् स्टकरको भूमिका निभाएका थिए । मनोवैज्ञानिक थ्रिलरको रूपमा बनेको यो फिल्म बक्स अफिसमा अत्यन्त सफल भयो । फिल्ममा सन्नी देओल, जुही चावला र अनुपम खेरलगायत कलाकारहरूको पनि सशक्त अभिनय रहेको छ ।