ललितपुर – काठमाडौं महानगरपालिकाका मेयर बालेन शाहले नयाँ राजनीतिक दल ‘देश विकास पार्टी’ दर्ता गर्ने तयारी तीव्र बनाएका छन्।  राष्ट्रिय स्वतन्त्र पार्टी (रास्वपा) सँग छलफल सकारात्मक निष्कर्षमा नपुगेमा ललितपुरको ज्वागलमा निर्माणाधीन घरलाई नै पार्टी कार्यालय बनाइने तयारी गरिएको छ।

ज्वागलमा रहेको उक्त घरको बाहिरी संरचना निर्माणको काम अन्तिम चरणमा पुगेको छ भने भित्री कोठाहरूमा अफिस सेटअपको काम पनि सुरु भइसकेको छ। कार्यालय प्रयोजनका लागि कोठा व्यवस्थापन, फर्निचर र अन्य आवश्यक संरचना मिलाउने काम भइरहेको स्रोतले जनाएको छ।

केही दिनयता बालेन शाह ज्वागलमै रहेका आफ्ना सहयोगी कुमार बेनको घरमा बसेर विभिन्न राजनीतिक भेटघाट र छलफलमा सक्रिय छन्। रासपासँग सहकार्यको सम्भावनाबारे निरन्तर संवाद भइरहे पनि अन्तिम सहमति भने भइसकेको छैन।

स्रोतका अनुसार सहमति भए बालेन रासपासँगै अघि बढ्नेछन्। सहमति नभए ‘देश विकास पार्टी’लाई औपचारिक रूपमा अघि बढाउँदै ज्वागलस्थित यही भवनबाट पार्टी गतिविधि सञ्चालन गरिने तयारी छ।

बालेनको सम्भावित नयाँ राजनीतिक कदमलाई लिएर राजनीतिक वृत्तमा चासो बढ्दै गएको छ।