काठमाडौं- चीनबाट इरानतर्फ गइरहेको पानीजहाजमा अमेरिकाको स्पेसल अपरेशन दस्ताले छापा मारेर कार्गो नियन्त्रणमा लिएको समाचार सार्वजनिक भएको छ । अमेरिकाबाट प्रकाशित हुने न्यूयोर्क टाइम्सका अनुसार हिन्द महासागरमा उक्त घटना भएको हो ।

इरानलाई आफ्नो सैन्य बल सुदृढ गर्नबाट रोक्नका लागि अमेरिकाले यस्तो कारवाही गरेको टाइम्सले उल्लेख गरेको छ । आणविक कार्यक्रमका कारण विश्व समुदायबाट अलग्गिएको इरानलाई दबाब दिन अमेरिकाले कारवाही सञ्चालन गरेको जनाइएको छ ।

केही महिनाअघि इरान र इजरयालबीच छोटो द्वन्द्व भएको थियो । १२ दिनसम्म चलेको द्वन्द्वमा १ हजारभन्दा धेरैले ज्यान गुमाएका थिए ।

उक्त द्वन्द्वमा इजरायलको पक्ष लिएर अमेरिकाले हवाई आक्रमण गर्दा इरानको आणविक कार्यक्रममा गम्भीर क्षति पुगेको थियो ।

पछिल्लो समय अमेरिकाले चीनबाट इरानतर्फ जाने पानीजहाजको सूक्ष्म निरीक्षण गरिरहेको छ । सोही क्रममा हिन्द महासागरको श्रीलंका टापुनजिकै अमेरिकी स्पेसल अपरेशन दस्ताले उक्त पानीजहाजमा छापा मारी कार्गो नियन्त्रणमा लिएको हो ।

कार्गो नियन्त्रणमा लिएपछि उक्त जहाजलाई छाडिएको थियो । उक्त कार्गोमा नागरिक र सैनिक दोहोरो प्रयोजनका लागि आवश्यक संदिग्ध सामान बरामद गरिएको जनाइएको छ ।