काठमाडौं- चिनियाँ तटरक्षक युद्धपोतसँगको झडपमा परी दक्षिण चीन सागरको विवादित क्षेत्रमा फिलिपिन्सका तीन जना माझीहरु घाइते भएका छन् । घटनामा फिलिपिन्सका माछा मार्ने दुई डुङ्गामा पनि क्षति पुगेको छ ।

चिनियाँ तटरक्षक युद्धपोतले माछा मारिरहेको फिलिपिनी डुङ्गालाई लक्षित गरी पानीको फोहोरा प्रहार गरेको च्यानल न्यूज एशियाले जनाएको छ । घटना दक्षिण चीन सागरको सबिना शोल क्षत्रनजिकै भएको हो ।

फिलिपिन्सले आफ्नो मुलुकका दुई दर्जनभन्दा बढी डुङ्गामा चिनियाँ युद्धपोतले फोहोरा प्रहार गरेको आरोप लगाएको छ । पछि समुद्रमा फसेका माझीलाई उद्धार गर्न घटनास्थलमा फिलिपिन्सले पनि तटरक्षक जहाज परिचालन गरेको थियो ।

घटनापछि फिलिपिन्सले चीनलाई अन्तर्राष्ट्रिय कानुनको पालना गर्न आग्रह गरेको छ । यसबारे मनिलामा रहेको चिनियाँ राजदूतावासले कुनै टिप्पणी नगरेको उक्त च्यानलले जनाएको छ ।