काठमाडौं- नेपाली कांग्रेसका महामन्त्री विश्वप्रकाश शर्माले आगामी फागुन २१ मा हुने निर्वाचनमा उम्मेदवारी नदिने घोषणा गरेका छन्।

बिहीबार सानेपामा बसेको पार्टीको केन्द्रीय कार्यसम्पादन समिति बैठकमा शर्माले आगामी निर्वाचनमा आफू उम्मेदवार नहुने बताएका हुन् ।

‘हिजो झापामा थिएँ, उम्मेदवारमा दाबी गर्न आउनुस् भनेर साथीहरूलाई क्षेत्रीय समितिको बैठकमै भनिसकेँ’, शर्माले भने, ‘एक वर्षअघि नै मैले लड्दिनँ भनेको हो । २०८१ पुस २१ गते धुलाबारीमा आगामी चुनावमा उम्मेदवार बन्न इच्छुक साथीहरू मिहिनेत गर्नुस्, म उम्मेदवार बन्दिनँ भनिसकेको थिएँ ।’

उनले यस पटक सर्वसम्मत उम्मेदवारमा सिफारिस गरेकामा झापा क्षेत्र नम्बर १ का कांग्रेस समितिलाई धन्यवाद दिएको पनि उनले बताए ।

लगातार तीन पटक उम्मेदवार बनिसकेको अवस्थामा अरूलाई अघि सार्ने प्रस्ताव क्षेत्रमा गरिसकेको उनले बताए । उनले आफू जीवित हुन्जेल क्षेत्र कब्जाको पक्षमा नरहेको पनि बताएका छन् । हार्दा मात्रै छाड्ने प्रवृत्तिलाई आफूले चुनौती दिएको उनले बताए ।

‘लगातार तीन पटक उम्मेदवार बनिसकेकोले अरुलाई अघि सार्ने प्रस्ताव क्षेत्रमा गरेर आएको छु’, उनले भने, ‘गत चुनावमा म आफ्नो क्षेत्रमा सीमित थिएँ, यस पटक देशव्यापी पुग्नेछु। यो चुनावमा अनुहार बदलेर जानुपर्छ, बढीभन्दा बढी युवा र नयाँ साथीलाई ल्याएर जिताऊँ ।’

फागुन २१ मा निर्वाचन गर्न वातावरण बन्न नसकेको उनले बताए । ‘चुनाव हुन कि त सरकारले वातावरण बनाउनु पर्छ कि त सर्वपक्षीय संवाद र छलफल गरेर वैशाखमा सार्नुपर्छ’, उनले भने ।