काठमाडौं- अमेरिकाको न्यूयोर्क विश्वविद्यालयको पुस्तकालयभित्र यहूदीविरोधी, भारतविरोधी र रंगभेदी शब्द पोतिएपछि अमेरिकी कंग्रेसम्यान राजा कृष्णमूर्तीले निन्दा गरेका छन् । अमेरिकी कंग्रेसमा डेमोक्र्याटिक पार्टीका तर्फबाट इलेनोई राज्यको प्रतिनिधित्व गर्ने भारतीय मूलका प्रतिनिधि कृष्णमूर्तीले यस घटनाको निन्दा गरेका हुन् ।

विश्वविद्यालयको बर्न डिब्नर पुस्तकालयभित्र स्वस्तिक चिन्ह र रंगभेदी शब्द पोतिएको घटना सार्वजनिक भएपछि सरोकारवाला र अभियन्ताहरुले चिन्ता व्यक्त गरेका छन् । स्वस्तिकलाई पश्चिमा विश्वमा यहूदीविरोधी चिन्ह मानिन्छ ।

कृष्णमूर्तीले विज्ञप्ति जारी गर्दै यस घटनालाई ‘चिन्ताजनक र पूर्ण रुपमा अस्वीकार्य’ भनेका छन् । उनले कुनै पनि विश्वविद्यालय क्याम्पस र समाजमा रंगभेदी गतिविधिलाई ठाउँ दिन नहुने उल्लेख गरेका छन् ।

उनले घटनाको अनुसन्धान गर्न पनि आह्वान गरेका छन् । घटनाबारे विश्वविद्यालय प्रशासनले कुनै टिप्पणी नगरेको भारतीय समाचार संस्था एएनआईले जनाएको छ ।