काठमाडौं- ताइवानको विदेश मन्त्रालयले चीनमाथि तथ्यलाई नै तोडमोड गरेको आरोप लगाएको छ । चीनले आफ्नो नीति दस्तावेजमा ‘ताइवान चीनको अविभाज्य भूभाग हो ।’ भनेर उल्लेख गरेपछि ताइवानको विदेश मामिला मन्त्रालयले यस्तो आरोप लगाएको हो ।

हाल चिनियाँ सत्तामा रहेको कम्युनिष्ट पार्टीले इतिहासको कुनै कालखण्डमा पनि ताइवानी भूभागमा शासन नगरेको स्पष्ट पार्दै विदेश मन्त्रालयले कम्युनिष्ट शासन रहेको जनगणतन्त्र चीन र लोकतान्त्रिक शासन रहेको गणतन्त्र चीन दुई फरक सार्वभौमिकता हुन् भनेको छ । ताइवानले आधिकारिक रुपमा आफूलाई गणतन्त्र चीन भनेर चिनाउने गरेको छ ।

यसअघि जनगणतन्त्र चीनको विदेश मन्त्रालयले ल्याटिन अमेरिका र क्यारेबियन क्षेत्रका लागि जारी गरेको नीति दस्तावेजमा अन्य मुलुकसँग कूटनीतिक सम्बन्ध स्थापनाका लागि ‘एक चीन नीति’ आधारभूत अनिवार्यता रहेको उल्लेख छ । चीनले बेइजिङमा रहेको कम्युनिष्ट सरकार मात्रै चीनको एकमात्र वैध नेतृत्वकर्ता रहेको बताउने गरेको छ ।

चीनले बारम्बार ताइवानलाई एकीकरण गरेरै छाड्ने बताउँदै आएको छ । ताइवानलाई गाभ्नका लागि आवश्यक परे बल प्रयोग गर्ने चिनियाँ नीति रहिआएको छ ।