काठमाडौं – भारतले महिला टी-२० सिरिजमा श्रीलंकामाथि लगातार दोस्रो जित निकालेको छ।
दोस्रो खेलमा मंगलबार भारतले श्रीलंकामाथि ७ विकेटको जित निकालेको हो। यो जितसँगै भारत पाँच खेलको शृंखलामा २–० ले अगाडि छ।
श्रीलंकाले दिएको १२९ रनको लक्ष्य भारतले ११ ओभर ५ बलमा तीन विकेटको क्षतिमा भेट्टाएको हो। भारतको जितमा सेफाली वर्माले अर्धशतक बनाइन्।
सेफालीले ३४ बलमा ११ चौका १ छक्कासहित अविजित ६९ रन बनाएकी हुन्।
सुरुमा ब्याटिङ गरेको श्रीलंकाले ९ विकेट गुमाउँदै १२८ रन बनाएको थियो। श्रीलंकाको ब्याटिङलाई भारतका स्पिनरले नियन्त्रणमा राखेका थिए।
वैष्णवी शर्मा र एन श्री चरानीले समान दुई विकेट लिए। पाँच खेलको सिरिजका बाँकी खेल थिरुवनन्तपुरममा हुनेछन्।
प्रतिक्रिया