काठमाडौं- पाँचथरको एकमात्रै प्रतिनिधिसभा निर्वाचन क्षेत्रमा नेपाल कम्युनिस्ट पार्टी (नेकपा)बाट हर्कबहादुर नेमाङ मिक्सोको नाम प्रतिनिधिसभाका लागि एकल सिफारिस भएको छ।

पार्टीको मंगलबार बसेको जिल्लास्तरीय बैठकले सर्वसम्मत रुपमा उनलाई उम्मेदवार बनाउने निर्णय गरेको पार्टी नेता दिनेश लावतीले बताए ।

लावतीका अनुसार जिल्ला कार्यसमितिको बैठकले उनको उम्मेदवारीलाई सर्वसम्मत रूपमा अनुमोदन गरेको हो ।

एकभन्दा धेरै दावेदार रहेको अवस्थामा जेनजी र महिलासहित पाँच जनाको नाम पठाउने पार्टी केन्द्रले परिपत्र गरेको भए पनि मिक्सोको नाममा सर्वसम्मति भएकोले एकल सिफारिस भएको बताइएको छ ।

मिक्सो पूर्वमाओवादी हुन् । माओवादीमा हुँदा कोशी प्रदेश इन्चार्जको भूमिकामा रहेका उनको घर पाँचथर नै हो ।

२०७९ को निर्वाचनमा गठबन्धनबाट नेपाली कांग्रेसका भीष्मराज आङ्देम्बेलाई माओवादीले पनि सहयोग गरेको थियो । यस्तै नेकपा एकीकृत समाजवादीले पनि सहयोग गरेर प्रदेशमा आफ्नो उम्मेदवार उठाएको थियो।

माओवादील केन्द्रमा आङदेम्बेलाई सहयोग गरेर प्रदेशमा इन्द्र आङ्बोलाई उम्मेदवार बनाएको थियो।

आङबो अहिले पनि प्रदेशसभा सांसद छन् । भने नेकपा एकीकृत समाजवादीबाट कमल जवेगु प्रदेशसभा सांसद छन्।

२०७९ को निर्वाचनमा पाँच दलीय गठबन्धनलाई पाखा लगाउँदै एमालेका उम्मेदवार वसन्तकुमार नेम्बाङ विजय भएका थिए। अहिले नेम्बाङ गम्भीर बिरामीमा परेका कारण उपचार गराइरहेका छन् ।

यस क्षेत्रमा काङ्ग्रेसले पुन:आङ्देम्बेलाई उम्मेदवार बनाउने तयारी गरेको छ भने एमालेबाट नयाँ अनुहारलाई प्रतिस्पर्धा गराउने तयारी गरिएको छ।