काठमाडौं– बलिउडका चर्चित अभिनेता अक्षय कुमार लामो समयपछि टेलिभिजनमा पुनः उपस्थित हुन लागेका छन् । उनी सोनी टिभीमा प्रसारित हुने नयाँ रियालिटी शो ‘ह्वील अफ फर्च्यून’ को होस्ट बन्ने तयारीमा छन् ।  निर्माताले हालै शोको प्रोमो सार्वजनिक गरेका छन् ।

यो कार्यक्रम विश्वभर करिब ६० देशमा लोकप्रिय छ र अमेरिकामा आठ पटक एमी अवार्ड जितिसकेको नम्बर एक गेम शो मानिन्छ । 

भारतीय मिडिया अनुसार, यो कार्यक्रम सन् २०२६ को सुरुवातमा अमिताभ बच्चनको ‘कौन बनेगा करोडपति’ पछि प्रिमियर हुन सक्ने सम्भावना रहेको छ, यद्यपि निर्माताले अहिलेसम्म आधिकारिक मिति खुलाएका छैनन् ।

अक्षय कुमारको टेलिभिजन यात्रा सन् २००४ मा ‘सेभेन डेडली आट्र्स’ बाट सुरु भएको थियो । त्यसपछि उनी ‘खतरों के खिलाडी’ को सिजन १, २ र ४ होस्ट गर्न सफल भए । 

सन् २०१० मा उनी ‘मास्टर शेफ इन्डिया’ सिजन १ मा न्यायाधीश बने ।  २०१४ मा उनले ‘डेयर २ डान्स’, र २०१७ मा ‘द ग्रेट इन्डियन लाफ्टर च्यालेन्ज’ मा जजको भूमिका निर्वाह गरे ।

निर्माताको रूपमा पनि अक्षय सक्रिय रहेका छन्; उनले ‘जमाई राजा’ धारावाहिक सिर्जना गरेका थिए। यसरी टेलिभिजनमा लामो समयपछि फर्कँदै गर्दा अक्षयले आफ्नो अनुभव र लोकप्रियता मार्फत दर्शकलाई मनोरञ्जनको नयाँ अनुभव दिने अपेक्षा गरिएको छ ।