काठमाडौं- मंसिर २९ भित्रै क्रियाशील सदस्यता बाँडिसकेर पालिकामा सिफारिस गरिसक्नुपर्ने कार्यताालिका बनाएको नेपाली कांग्रेसले अझै १३ निर्वाचन क्षेत्रमा सदस्यता फाराम पठाउन सकेको छैन । आइतबारको बैठकमा भएको ब्रिफिङअनुसार मधेस र काठमाडौं उपत्यका आसपासका जिल्लाका गरी १३ निर्वाचन क्षेत्रमा सदस्यता फाराम पुग्न बाँकी रहेको हो ।

सुरुमा पठाएका नयाँ क्रियाशील सदस्यता फाराममा क्रम संख्या नभएपछि वितरण रोकिएको थियो । सदस्यता वितरण रोकिएपछि पुस २ मा केन्द्रीय सदस्यता व्यवस्थापन समितिको बैठकले क्रमसंख्यासहितका फाराम पठाउने निर्णय गरेको थियो । त्यस्तो निर्णयपछि २४ घण्टाभित्र निर्वाचन क्षेत्रमा फाराम पुर्‍याउनेगरी काम गर्न महामन्त्री गगन थापाले निर्देशन दिएका थिए ।

‘केन्द्रमा क्रमसंख्या आउने पनि होइन । त्यसछिको रेकर्ड रहने पनि होइन । अनलाइन फाराम भराउने युगमा नबुझ्नेहरूले विरोध गर्दा निर्णय पुनरवलोकन गर्नुपर्‍यो,’ पुस २ गतेको बैठकपछि समितिका सदस्य प्रकाश रसाइलीले भनेका थिए, ‘अबको २४ घण्टामा क्रियाशील सदस्यता निर्वाचन क्षेत्रमा पुर्‍याउँछौँ । व्यावहारिक रूपमा कार्यतालिकाभित्रै हुनेगरी प्रक्रिया अघि बढ्छ ।’

उनले त्यस्तो प्रतिबद्धता जनाएको चार दिन बित्दा अझै १३ निर्वाचन क्षेत्रमा क्रियाशील सदस्यता पठाउनै बाँकी रहेको हो । मधेस प्रदेशका कतिपय निर्वाचन क्षेत्रले सदस्यता फाराम लिन प्रतिनिधि नपठाएको सचिवालयको भनाइ छ । सदस्यता व्यवस्थापन समितिकी सदस्य सीता गुरुङ भोलिसम्म सबै निर्वाचन क्षेत्रले सदस्यता फाराम लगिसक्ने विश्वास लिएको बताउँछिन् ।