काठमाडौं- नेकपा एमालेका नवनिर्वाचित अध्यक्ष केपी शर्मा ओलीले आफूलाई अधिनायकवादी र तानाशाह भन्नेलाई जवाफ फर्काएका छन् ।

बिहीबार सकिएको एघारौँ महाधिवेशनबाट निर्वाचित केन्द्रीय कमिटीको पहिलो बैठकलाई शुक्रबार काठमाडौंमा सम्बोधनका क्रममा उनले यस्तो भनेका हुन् ।

बबरमहलस्थित कार्की ब्याङ्केटमा दिउँसो पौने ३ बजेदेखि सुरु भएको बैठकलाई सम्बोधनका क्रममा उनले एमालेविरुद्ध अनेक तत्वले उल्क्याउने भएकाले सचेत हुन भनेका छन् ।

‘उल्क्याउँछन्, त्यहाँ (एमालेमा) त कोही बोल्नै पाउँदैनन् भन्छन् । त्यहाँ केपी ओलीको अधिनायकवाद र तानाशाह चल्छ भन्छन्’, उनले भने, ‘त्यहाँ केपी ओलीसँग आँखा जुधाएर बोल्न सक्दैनन्। झोलेहरू मात्रै बस्छन् भन्छन् । केपी ओलीले विरोध गर्नुपर्ने कुनै काम गर्दैन, अनि के का लागि मेरो आलोचना गर्नू ?’ ।

उनले अहिले देश अप्ठ्यारो अवस्थामा रहेकाले यसलाई सजिलो बनाउने काम अब एमालेले गर्ने पनि बताए ।