काठमाडौं– नेपाल चिकित्सक संघ (एनएमए)को केन्द्रीय कार्यकारिणी समितिको निर्वाचन प्रक्रिया औपचारिक रूपमा अघि बढेको छ । 

निर्वाचन समिति (२०८२–२०८५) ले विभिन्न पदका लागि उम्मेदवारहरूको प्रारम्भिक नामावली सार्वजनिक गरेको छ ।

 निर्वाचन समितिका अनुसार अध्यक्ष, वरिष्ठ उपाध्यक्ष, उपाध्यक्ष (प्रदेश प्रतिनिधित्वसहित), महासचिव, कोषाध्यक्ष, सह–महासचिव तथा कार्यकारिणी सदस्य पदका लागि उम्मेदवारी दर्ता भएका छन् । प्रकाशित नामावलीप्रति कुनै दाबी, विरोध वा संशोधन गर्नुपर्ने भएमा तोकिएको समयभित्र उजुरी दिन सकिने व्यवस्था गरिएको छ ।

समितिले २०८२-०९-०४ गते बिहान १० बजेदेखि दिउँसो ४ बजेसम्म निर्वाचन समितिको कार्यालय, सिद्धि सदन, एक्जिबिसन रोड, काठमाडौंमा उपस्थित भई वा आधिकारिक इमेलमार्फत उजुरी दर्ता गर्न सकिने जनाएको छ । प्राप्त उजुरीहरूको छानबिनपछि निर्वाचन तालिकाअनुसार अन्तिम उम्मेदवार नामावली सार्वजनिक गरिनेछ ।

नेपाल चिकित्सक संघको निर्वाचन समितिमा प्रमुख निर्वाचन अधिकृत डा. प्रणय रत्न शाक्य, निर्वाचन अधिकृत अधिवक्ता बाबुराम अर्याल तथा डा. अतीत पौडेल रहेका छन् । समितिले निर्वाचन प्रक्रिया पारदर्शी, निष्पक्ष र समयमै सम्पन्न गर्ने प्रतिबद्धता जनाएको छ ।