काठमाडौं- नेकपा एमालेमा दशौँ महाधिवेशनका उपमहासचिव प्रदीप ज्ञवालीले केन्द्रीय सदस्य पदमा मात्रै उम्मेदवारी दिएका छन् ।

महासचिव पद नपाएपछि असन्तुष्ट उनले महाधिवेशनस्थल भृकुटीमण्डपमा पुगेर केन्द्रीय सदस्यमा मात्रै उम्मेदवारी दिएका हुन् ।

महाधिवेशनस्थल छोडेर हिँडेका उपमहासचिव ज्ञवालीले केही बेरअघि फर्किएर केसमा उम्मेदवारी दर्ता गराएका हुन् ।

शंकर पोखरेललाई अध्यक्ष केपी शर्मा ओलीले महासचिवमा दोहोर्‍याएपछि असन्तुष्ट उनको विद्रोहले संस्थापनमा संकट ल्याएको छ।

उनलाई महासचिव नबनाएको भन्दै अर्का उपमहासचिव पृथ्वी सुब्बा गुरुङ र उपाध्यक्ष विष्णु पौडेल रुष्ट छन् । यसअघि ज्ञवाली र गुरुङ दुवैले महाधिवेशनस्थल छाडेका थिए ।

एमालेको महासचिव पदमा दोहोरिने गरी शंकर पोखरेलले मनोनयन गराइसकेका छन् । ओली समूहले यी दुवैजनालाई उपाध्यक्षको सूचीमा राखेको छ ।

निर्वाचन आयोगले तोकेको समयअनुसार उम्मेदवारी मनोनयनको समय सकिएको छ।