काठमाडौं – रुकुमकोटमा पहिलो पटक आयोजना भएको इनडोर स्केटिङ प्रतियोगिताको सिनियर पुरुषतर्फ निरज मल्ल विजेता बनेका छन् ।

नवीन पुन दोस्रो र सुशील श्रेष्ठ तेस्रो भएका छन् । सिनियर महिलातर्फ जेनिशा श्रेष्ठ पहिलो, सपना श्रेष्ठ दोस्रो र वर्षा रोका तेस्रो भएका छन् । पहिलो हुनेले १० हजार, दोस्रोले ७ हजार ५ सय र तेस्रोले ५ हजार रुपैयाँ पुरस्कार पाएका छन् ।

प्रतियोगिताको जुनियर पुरुषतर्फ कृश विक्रम पहिलो, जेनिश श्रेष्ठ दोस्रो र मिकल नेपाली तेस्रो भए । जुनियर महिलातर्फ युनिका बिके विजेता, आयुष्मा रोका दोस्रो र सुइसान्मी रोका तेस्रो बने । उनीहरुले पाँच हजार, तीन हजार र दुई हजार रुपैयाँ पुरस्कार पाए ।

युवा जमातकाबीच लोकप्रिय खेल स्केटिङको विकास, प्रवर्द्धन तथा व्यावसायिकताका लागि नेपालमा यस्ता प्रतियोगिता आवश्यक रहेको नेपाल स्केटिङ तथा स्केट बोर्डिङ सङ्घका अध्यक्ष अच्युत खनालले जानकारी दिए।