काठमाडौं– पेन डाउन गरेर आन्दोलनमा उत्रिएका भन्सार एजेन्टहरूले आन्दोलन फिर्ता लिएका छन् । 

बुधबार भन्सार एजेन्ट महासंघ र भन्सार विभागबीच भएको वार्तामार्फत आन्दोलनमार्फत उठाइएका माग सम्बोधन गर्ने सहमति भएपछि एजेन्टहरूले आन्दोलन स्थगित गरेका हुन् ।

भन्सार ऐन २०८२ मा समावेश गरिएका कतिपय प्रावधानहरूले भन्सार एजेन्टहरूको पेशागत हकहित, काम गर्ने सहजता तथा अन्तर्राष्ट्रिय व्यापार सहजीकरणमा समेत नकारात्मक असर पुर्‍याउने वातावरण सृजना भएको हुँदा विरोध स्वरूप भन्सार एजेन्ट महासंघ नेपालले आन्दोलन सुरु गरेको र विभागसँग छलफल भई सकारात्मक रूपमा महासंघका माग सम्बोधन भएकाले पेन डाउन कार्यक्रम फिर्ता लिएको प्रेस विज्ञप्तिमा जनाइएको छ ।

भन्सार विभागले पनि बुधबार एक प्रेस विज्ञप्ति जारी गर्दै विभाग र सम्बन्धित कार्यालयबाट सम्बोधन हुने माग क्रमशः कार्यान्वयन गर्दै जाने र नियमावलीमार्फत सम्बोधन गर्नुपर्ने उपयुक्त विषयमा अर्थ मन्त्रालयमा अवगत गराउने जनाएको छ ।