काठमाडौं- जापानसँग तनाव बढिरहेका बेला चिनियाँ अधिकारीले साङ्घाई शहरमा आयोजित जापानी एनिमे गायिका माकी ओत्सुकीको साङ्गीतिक प्रस्तुती बीचैमा रोकेका छन् । जापानी एनिमे सिरिज ‘वान पिस’ को पाश्र्व गीत गाउने ओत्सुकीले बान्डाइ नाम्को नामक प्रदर्शनीमा प्रस्तुती दिइरहेकी थिइन् ।

प्रस्तुती दिँदादिँदै बीचैमा उनलाई रोकिएको उनका प्रतिनिधिले वेबसाइटमा जानकारी दिएका छन् । तीन दिनसम्म उक्त प्रदर्शनीमा विभिन्न कलाकार र साङ्गीतिक समूहले प्रस्तुती दिने तय भएको थियो ।

तर, पहिलो दिन नै उनको प्रस्तुती रोकिएपछि दुई दिनका कार्यक्रम रद्द भएका छन् । जापानबाट प्रकाशित हुने निक्के एशिया रिभ्यूले जनाएअनुसार यस घटनालाई पछिल्लो समय जापान र चीनबीच उत्पन्न विवादसँग जोडेर हेरिएको छ ।

हालै जापानी प्रधानमन्त्री सनाए तकाइचीले ताइवानका विषयमा विवादास्पद बयान दिएपछि चीन क्रुद्ध भएको छ ।