काठमाडौं- पाकिस्तानमा एचआईभी सङ्क्रमितको सङ्ख्या ह्वात्तै बढेको पाइएको छ । विश्व स्वास्थ्य संगठन डब्लूएचओ र एचआईभी एड्ससम्बन्धी संयुक्त राष्ट्रसंघीय निकायले सार्वजनिक गरेको तथ्यांकमा सङ्क्रमणको अवस्था भयावह रहेको देखिएको हो ।

सार्वजनिक तथ्यांकमा सन् २०१० मा पाकिस्तानमा एचआईभी सङ्क्रमितको सङ्ख्या १६ हजार रहेकोमा सन् २०२४ यो बढेर ४८ हजार पुगेको छ । यसअघि निश्चित समूहमा मात्रै यसको विस्तार भइरहेको भएपनि हाल यो तीव्र गतिमा फैलिरहेको जनाइएको छ ।

हाल बालबालिका, पतिपत्नी र समुदायमा समेत फैलिरहेको छ । खासगरी, असुरक्षित रगत व्यवस्थापन, असुरक्षित यौन सम्पर्क, परीक्षण र रोकथामको कमीजस्ता कारणले एचआईभी विस्तार बढिरहेको प्रतिवेदनमा जनाइएको छ ।

एचआईभी सङ्क्रमणको विस्तार नियन्त्रणका लागि थप कदम चाल्न पाकिस्तनी स्वास्थ्य मन्त्रालयसँग पनि ती निकायले आग्रह गरेका छन् । त्यसबाहेक एचआईभी सङ्क्रमितप्रति पाकिस्तानी समाजको दृष्टिकोणमा पनि व्यापक परिवर्तन आवश्यक रहेकोे प्रतिवेदनमा औँल्याइएको छ ।