काठमाडौं- भारतमा एचआईभी सङ्क्रमितहरुको सङ्ख्या ह्वात्तै घटेको पाइएको छ । भारत सरकारले सार्वजनिक गरेको तथ्याङ्क अनुसार सन् २०१० देखि सन् २०२४ सम्म भारतमा एचआईभी सङ्क्रमितको सङ्ख्या ४९ प्रतिशतले घटेको छ ।

त्यसैगरी, सोही अवधिमा एड्सबाट मृत्यु हुनेको सङ्ख्या ८१ प्रतिशतले घटेको छ । त्यस्तै, सरकारी तथ्याङ्क अनुसार सो अवधिमा आमाबाट बच्चामा हुने सङ्क्रमणको सङ्ख्या पनि ७५ प्रतिशतले घटेको छ ।

बिजनेस स्ट्यान्डर्डका अनुसार एचआईभी परीक्षणमा आएको व्यापाक सुधारका कारण यो सम्भव भएको हो । भारतको स्वास्थ्य मन्त्रालयका अनुसार सन् २०२०–२१ मा ४ करोड १२ लाख एचआईभी परीक्षण भएकामा सन् २०२४–२५ मा यो बढेर ६ करोड ६२ लाख पुगेको छ ।

त्यसबाहेक एन्टीरेट्रोभाइरल थेरापीको कभरेज पनि बढेको छ । सो अवधिमा यस उपचार सेवा लिनेहरुको सङ्ख्या १४ लाख ९० हजारबाट बढेर १८ लाख ६० हजार पुगेको छ ।

भाइरल लोड टेस्टिङको पहुँचमा पनि उच्च वृद्धि भएको पाइएको छ । सो अवधिमा यो परीक्षण ८ लाख ९० हजारबाट बढेर १५ लाख ९० हजार पुगेको छ ।