काठमाडौं- काठमाडौं गोर्खाजका शाहब आलमले नेपाल प्रिमियर लिग एनपीएल सिजन २ को पहिलो ह्याट–ट्रिक पूरा गरेका छन् । पोखरा एभेन्जर्सविरुद्धको खेलमा आलमले ह्याट-ट्रिक पूरा गरेका हुन् ।

त्रिवि अन्तर्राष्ट्रिय क्रिकेट मैदानमा बिहीबारको पहिलो खेलअन्तर्गत दोस्रो इनिङको अन्तिम ओभरमा उनले ह्याट–ट्रिक पूरा गरे । उक्त ओभरको पहिलो, दोस्रो र तेस्रो बलमा उनले लगातार विकेट लिए ।

ओभरको पहिलो बलमा ऋषि धवन मिलिन्द कुमारको हातबाट क्याच आउट भए । त्यसैगरी, सोलगत्तै ओभरको दोस्रो बलमा विपिन खत्री स्टम्पिङको शिकार भए ।

तेस्रो बलमा भने आकाश चन्द पनि मिलिन्द कुमारको हातबाट क्याच आउट भए । यस ओभरको अन्तिम बलमा पनि शाहब आलमले सागर ढकालको विकेट लिए । उनी करण केसीको हातबाट क्याच भएका थिए ।

त्यसअघि उनले जेसन रोय र किरण ठगुन्नाको विकेट पनि लिएका थिए । समग्रमा यस इनिङमा शाहब एक्लैले ६ विकेट लिए ।

शाहब आलमको उत्कृष्ट बलिङको मद्दतमा काठमाडौंले पोखरालाई १३ रनले पराजित गर्‍यो ।