काठमाडौं– बलिउड अभिनेत्री सन्नी लियोनीले चितवन हात्ती महोत्सवमा हुने क्रूरता र पशु यातनाको अन्त्य गर्न आग्रह गरेकी छन्। 

पशु अधिकारको क्षेत्रमा कार्यरत संस्था पेटा एसियामार्फत उनले महोत्सवमा हात्तीहरूलाई पिट्ने, हिर्काउने र अस्वभाविक क्रियाकलापमा बाध्य पार्ने जस्ता  कार्यको अन्त्य गर्नुपर्ने बताएकी हुन्। 

लियोनीले भनिन्, ‘चितवन हात्ती महोत्सवमा सहभागी हुँदा खुसी हुनुपर्ने कारण छैन, किनकि कार्यक्रमको लागि हात्तीहरूलाई यातना दिइन्छ।’

पेटा एसियाले सामाजिक सञ्जालमार्फत सन्नी लियोनीको अभिव्यक्तिलाई सेयर गर्दै सबैलाई महोत्सवलाई करुणा, शिक्षा र विस्मयको उत्सवमा रूपान्तरण गर्न आह्वान गरेको छ। 

सन्नी लियोनी लामो समयदेखि पशु अधिकारको क्षेत्रमा सक्रिय रहँदै आएकी छन्। सन् २०१६ मा उनलाई पेटा एसियाले ‘पर्सन अफ द इयर’ घोषणा गरेको थियो। उनी पेटा इन्डियाको शाकाहारी जीवन प्रवर्धन, भुवाविरोधी अभियान, र कुकुर–बिरालोको बन्ध्याकरणविरुद्धको पहलमा पनि सक्रिय सहभागी रहँदै आएकी छिन्।

चितवन हात्ती महोत्सव वर्षेनी  सौराहमा आयोजना हुने गर्छ । विगतमा यसमा हात्ती दौड, पोलो तथा हात्ती ब्युटी पेजेन्ट कार्यक्रम गरिन्छ। यस वर्ष पनि महोत्सव हुने तयारी भइरहेको समयमा पेटा एसियाले पशु कल्याणतर्फ चासो देखाएको छ।