काठमाडौं– मनाङमा निर्माण हुन लागेको ६१.११ मेगावाटको नार खोला जलविद्युत आयोजना अब कुमारी बैंकको अगुवाइमा अघि बढ्ने भएको छ। बैंक समूह र प्रवद्र्धक कम्पनीबीच सोमबार वित्तीय ऋण लगानी सम्झौता सम्पन्न भएको छ।

नार खोला हाइड्रो इनर्जी प्रालिका अध्यक्ष बटु लामिछाने र कुमारी बैंकका प्रमुख क्षेत्रीय कर्जा अधिकृत अर्पण पोखरेलले संयुक्त रूपमा हस्ताक्षर गर्दै वित्तीय संरचना टुङ्ग्याएका हुन्।

मनाङको नार्पाभूमि र नासोँ गाउँपालिकामा पर्ने नार खोला र सोती खोलालाई एकीकृत गरेर आयोजना निर्माण हुँदैछ। ६१.११ मेगावाट क्षमताको यो आयोजना नेपाल विद्युत प्राधिकरणसँगको पावर पर्चेज एग्रिमेन्ट पहिले नै भइसकेको छ।

वित्तीय व्यवस्थापन कुमारी बैंकले नेतृत्व गर्नेछ, भने नेपाल एसबीआई बैंक सह–अगुवाका रूपमा रहनेछ। कृषिविकास बैंक, एनआईसी एसिया बैंक र मुक्तिनाथ विकास बैंक सदस्य बैंक भएर सहभागी छन्।

आयोजनाको ग्रस हेड ५८८.८२ मिटर रहनेछ र वार्षिक उत्पादन ३६६.४८ गिगावाट घण्टा हुने अनुमान गरिएको छ। हेडरेस टनेल करिब ८ किलोमिटर लामो हुनेछ। बाँध नार्पाभूमि गाउँपालिकामा रहनेछ भने सुरुङमार्ग हुँदै नासोँ गाउँपालिकामा रहेको पावर हाउसमा पानी पुर्‍याइनेछ। उत्पादित विद्युत मनाङस्थित निर्माणाधीन धारापानी सबस्टेसनमा जोडिनेछ।

कुल लागत १२ अर्ब ८४ करोड रहेको आयोजनामा बैंक कर्जा ९ अर्ब ६३ करोड र स्वपूँजी ३ अर्ब २१ करोड छ। सिंगटी हाइड्रो इनर्जी लिमिटेड मुख्य लगानीकर्ता रहने कम्पनीले जनाएको छ।