काठमाडौं– काठमाडौंको बौद्धस्थित हायात होटेलभित्र रहेको क्यासिनोको काउन्टरमा रहेको रकम लुटपाट गर्ने दुईजना पक्राउ परेका छन्।

पक्राउ पर्नेहरूमा काठमाडौं महानगरपालिका–६, बौद्धका ४२ वर्षीय सेठ्ठी भनिने दावा शेर्पा र बूढानीलकण्ठ नगरपालिका–१२ का २९ वर्षीय रञ्जित खड्की छन्।

गत भदौ २३ र २४ गते जेनजी प्रदर्शनका क्रममा केही युवा हायात होटेल पुगेका थिए। उनीहरूले हतियार देखाएर क्यासिनोको काउन्टरमा रहेको रकम लुटेका थिए भने क्यासिनोमा तोडफोड तथा आगजनी समेत गरेका थिए।

घटनापछि फरार उनीहरूलाई खोजतालस गर्ने क्रममा काठमाडौंको बूढानीलकण्ठ क्षेत्रबाट पक्राउ गरिएको जिल्ला प्रहरी परिसर काठमाडौंले जनाएको छ।

दुवै जनामाथि चोरी तथा डाँकासम्बन्धी र आपराधिक उपद्रव गर्न नहुने कसुरमा अनुसन्धान भइरहेको परिसरका एसपी पवनकुमार भट्टराईले बताए।