काठमाडौं- चिनियाँ प्रतिनिधिको भ्रमणका बेला आफ्नो मोबाइल फोन, ल्यापटप र इन्टरनेट बन्द गर्न अस्ट्रेलियाको संघीय संसदका सदस्यहरुलाई आग्रह गरिएको छ । संसदको प्रशासन शाखाले यस्तो आग्रह गरेको हो ।

अस्ट्रेलियाको संसदीय सेवा विभागले संसद सदस्यहरुलाई इमेल पठाउँदै यस्तो आग्रह गरेको हो । उक्त विभाग संसदीय मामिला हेर्ने अस्ट्रेलिया सरकारको एकाइ हो ।

चिनियाँ राष्ट्रिय जनकंग्रेसको प्रमुख झाओ लेजीको अस्ट्रेलिया भ्रमणका क्रममा यस्तो आग्रह जारी गरिएको हो । ल्यापटप, मोबाइल फोन र इन्टरनेट बन्द गर्नका लागि गरिएको आग्रहलाई अस्ट्रेलियाकी साइबर सुरक्षा मामिलाबारे छायाँमन्त्री क्लेरी चान्डलरले ‘अत्यन्त चिन्ताजनक’ रहेको टिप्पणी गरेकी छिन् ।

उनले संसदले जारी गरेको यस्तो आग्रहले संवेदनशील डेटाको सुरक्षामा जोखिम उत्पन्न गरेको पनि बताएकी छिन् । संसद भ्रमणका क्रममा झाओ लेजीले विभिन्न किसिमका भेटवार्ता र रात्रिभोजमा सरिक भएको बेलायती अखबार द गार्जियनको अनलाइन संस्करणले जनाएको छ ।