नेपाल प्रहरीका पूर्वएआईजीपी विश्व पोख्रेल राष्ट्रिय स्वतन्त्र पार्टीमा प्रवेश गरेका छन् । उनी शुक्रबार उपसभापति डा. स्वर्णिम वाग्लेसहितका नेताको उपस्थितिमा बनस्थलीस्थित घण्टीघर पुगेर राजनीतिक यात्रा थालेका हुन् ।

१८ महिना वरिष्ठ भए पनि तत्कालीन प्रधानमन्त्री शेरबहादुर देउवाको सरकारका पालमा आईजीपी बन्न नपाएका पोखरेल शुक्रबार बनस्थलीस्थित केन्द्रीय कार्यालयमा पुगेर रास्वपा प्रवेश गरेका हुन् ।

रास्वपाले पोखरेललाई अनुशासन आयोगको नेतृत्व दिने तय गरिएको छ । आईजीपीको दौडमा अगाडि रहे पनि पोखरेललाई देउवा सरकारले अन्याय गरेको थियो । उनी त्यसबेला सर्वोच्च अदालत पनि गएका थिए।

तत्कालीन देउवा नेतृत्वको सरकारले एआईजीमा उनीभन्दा १६ महिना कनिष्ठ धीरजप्रताप सिंहलाई आईजीपी बनाएपछि उनी नियमित अवकाशमा गएका थिए ।

उनले त्यसपछि देउवासम्म पहुँच भएका बिचौलियाले आईजीपी बन्न ७ करोड रुपैयाँको प्रस्ताव गरेको खुलासा गरे । तर आफूले उक्त कुरा अस्वीकार गरेपछि आईजीपी बन्नबाट रोकेको उनले दाबी गरेका थिए ।

तस्बिरहरू : नेपाल फोटो लाइब्रेरी