काठमाडौं – नेपाल संयुक्त अरब इमिरेट्स (युएई)मा जारी एसिसी पुरुष यु-१९ प्रिमियर कपको सेमिफाइनलमा प्रवेश गरेको छ। बिहीबार भएको खेलमा हङकङलाई एक सय १९ रनले हराउँदै नेपाल सेमिफाइनल प्रवेश गरेको हो। पहिलो सेमिफाइनलमा नेपालले शनिबार मलेसियाको सामना गर्नेछ। अर्को सेमिफाइनलमा ओमान र यूएई भिड्नेछन्।

बिहीबार दोस्रो जित निकालेको नेपाल समूह विजेता बन्दै अन्तिम चारमा पुगेको हो। जितका लागि नेपालले दिएको दुई सय ७१ रनको लक्ष्य पछ्याएको हङकङले ४० ओभर पाँच बलमा सबै विकेट गुमाउँदा १०५ रनमा समेटिएको थियो।

यसअघि टस जितेर पहिले ब्याटिङ गरेको नेपालले निर्धारित ५० ओभरमा सात विकेटको क्षतिमा दुई सय ७० रन बनाएको थियो।

यसअघि मंगलबार भएको पहिलो खेलमा नेपालले साउदी अरबियालाई आठ विकेटले हराएको थियो। पहिला ब्याटिङ गरेको साउदीले जितका लागि दिएको दुई सय १९ रनको लक्ष्य नेपालले ३०.४ ओभरमा दुई विकेटको क्षतिमा भेट्टाएको थियो।

नेपालका लागि निरजकुमार यादवले शतकीय पारी खेलेका थिए। उनले ९० बलमा १३ चौका र एक छक्कासहित एक सय १४ रन बनाउँदा निश्चल क्षेत्रीले ६६ र वंश क्षेत्रीले ३० रन थपेका थिए।