काठमाडौं– काठमाडौंको असन र इन्द्रचोक क्षेत्र देशकै प्रमुख र पुरानो व्यापारिक केन्द्र हो । लिच्छविकालदेखि नै व्यापारका लागि चर्चित असन–इन्द्रचोक क्षेत्र मल्लकालसम्म आइपुग्दा दक्षिणमा भारत र उत्तरमा तिब्बतसँगको मुख्य व्यापारिक केन्द्रसम्म स्थापित भएको थियो ।

दिनको समयमा जति गुल्जार बन्छ असन–इन्द्रचोक क्षेत्र बिहान र साँझको समयमा पनि त्यस्तै रहने गर्दछ ।असनदेखि इन्द्रचोकसम्मको करिब दुई सय मिटरको दूरीमा विभिन्न भाँडाकुँडा, लत्ताकपडा लगायत नुनदेखि सुनसम्म पाइने गर्दछ ।

यो क्षेत्रमा विभिन्न चाडपर्वमा किनमेल गर्न आउनेहरूको निकै बाक्लो भीड लाग्ने गर्दछ । बिहानको समयमा भने अधिकांश हरिया सागसब्जी, विभिन्न तरकारी, फलफूल लगायत तातो सेल रोटी किन्न र खान पाइन्छ ।

बिहानी समयको व्यापारलाई व्यवस्थित गर्न काठमाडौं महानगरपालिकाले समयसीमा निर्धारण गरेको छ । एक वर्ष अघि ९ बजेसम्म व्यापार गर्न पाइने उक्त क्षेत्रमा अहिले भने बिहान ८ बजेसम्म मात्रै व्यापार गर्न पाइने नियम बनेको छ ।

तस्बिर : नेपाल फोटो लाइब्रेरी