काठमाडौं– जनता समाजवादी पार्टी (जसपा) नेपालले आजदेखि सङ्घर्षका कार्यक्रम सुरु गरेको छ ।

पार्टीको केन्द्रीय कार्यकारिणी समिति बैठकको निर्णयअनुसार घोषित कार्यक्रम अन्तर्गत जसपा नेपालले आज जिल्ला प्रशासन कार्यालयमार्फत प्रधानमन्त्री सुशीला कार्कीलाई ज्ञापनपत्र बुझाउने तयारी गरेको छ ।

यस्तै, मंसिर ११ देखि १५ गतेसम्म प्रत्येक संसदीय निर्वाचन क्षेत्रका विभिन्न सहर तथा बजारमा विरोध कार्यक्रम र कोणसभाका साथै जनपरिचालन गर्ने जसपा नेपालले जनाएको छ ।

घोषित कार्यक्रम अन्तर्गत मंसिर १९ र २१ गते माग तथा मुद्दा अङ्कित प्लाकार्ड, ब्यानरसहित जिल्ला सदरमुकामका जिल्ला प्रशासन कार्यालय अगाडि शान्तिपूर्ण धर्ना दिने, मंसिर २७ देखि पुस ४ गतेसम्म जिल्लास्तरीय विरोधसभा तथा जनसभाका कार्यक्रम रहेका छन् ।
यसैगरी पुस १२ गते विराटनगर, पुस १४ गते जनकपुर, पुस १५ गते वीरगञ्ज र पुस १७ गते भैरहवामा सभा गर्ने कार्यक्रम तय भएको जसपा नेपालले जनाएको छ ।