काठमाडौं – नेपालको यू-१९ टिमले युएईमा जारी एसिसी प्रिमियर कपमा विजयी सुरुवात गरेको छ। साउदी अरबविरुद्ध निजकुमार यादवको शतकीय इनिङमा नेपालले आठ विकेटको जित निकाल्दै शानदार सुरुवात गरेको हो।

यूएईको अजमानस्थित करवान ग्रुप मैदानमा नेपालले साउदीलाई आठ विकेटले हराउँदै विजयी सुरुवात गरेको हो।

साउदीले दिएको २१९ रनको लक्ष्य नेपालले ३०.४ ओभरमा दुई विकेटको क्षतिमा भेट्टाएको हो।

नेपालका लागि यादवले ९० बलमा १३ चौका र एक छक्कासहित एक सय १४ रन बनाए। निश्चल क्षेत्रीले ६६ र वंश क्षेत्रीले ३० रन थपेका थिए।

पहिले ब्याटिङ गरेको साउदीले ५० ओभरमा नौ विकेटको क्षतिमा दुई सय १८ रन बनाएको थियो। साउदीका लागि मोहम्मद जुबेर सुनसाराले सर्वाधिक ४८ रन बनाउँदा मोहम्मद रेहान सिद्दीकीले ४१ र ओमै अहमद वहाबले ३९ रन थपेका थिए।

बलिङमा नेपालका अशोक धामीले दुई विकेट हात पार्दा दर्श सोनार, सिब्रिन श्रेष्ठ, सुशीलबहादुर रावल र दयानन्द मण्डलले एकएक विकेट लिएका थिए। नेपालले दोस्रो खेलमा हङकङसँग बिहीबार प्रतिस्पर्धा गर्दैछ।