काठमाडौं- ताइवानले चीनमा विकसित आर्टिफिसियल इन्टिलिजेन्स सिस्टमको प्रयोगमाथि प्रतिबन्धको घोषणा गरेको छ । यससँगै अब ताइवानका सरकारी निकायहरुमा चीनमा विकसित भएका एआई सिस्ट प्रयोग गर्न पाइने छैन ।

चीनबाट उत्पन्न हुने साइबर सुरक्षाको जोखिम र मिथ्या सूचनाको प्रवाह रोक्नका लागि यस्तो घोषणा गरिएको ताइपेई टाइम्सले जनाएको छ । यसबारे ताइवानकी डिजिटल मामिलासम्बन्धी उपमन्त्री इसाबेल होउले औपचारिक घोषणा गरेकी हुन् ।

टाइमसका अनुसार ताइवानको राष्ट्रिय सुरक्षा ब्यूरोले चिनियाँ एआई मोडलहरुबाट उल्लेख्य सुरक्षा जोखिम रहेको पत्ता लगाएको थियो । यसरी सुरक्षा जोखिम उत्पन्न गर्ने चिनियाँ एआई मोडलमा डिपसिक, डोओबाओ, यियान, टोङ्ग्यी र युआनबाओ छन् ।

यस्ता एआई मोडलले चिनियाँ कम्युनिष्ट पार्टीको समर्थन गर्दै सूचना प्रवाह गर्ने जनाइएको छ । समाचारमा जनाइए अनुसार यी मोडलहरुले ऐतिहासिक तथ्यलाई तोडमोड गर्ने, चिनियाँ कम्युनिष्ट पार्टीको प्रचार गर्ने, राजनीतिक हिसाबमा निश्चित भाष्यलाई प्रोत्साहन गर्दै आएका छन् ।