काठमाडौं- सुर्खेतमा एउटै रुखमा सलको पासो लगाएर झुन्डिएको अवस्थामा किशोर-किशोरी भेटिएका छन् ।

वीरेन्द्रनगरस्थित काँक्रेबिहार जंगलमा जुम्लाका युवा र सुर्खेतकी युवती एकै रुखमा पासो लगाएको अवस्थामा मृत भेटिएका हुन् ।

वीरेन्द्रनगर नगरपालिका-१० की १६ वर्षीया दीपिका चौधरी र जुम्लाको कनकासुन्दरी गाउँपालिका-७ का १८ वर्षीय नरेश खत्री मृत एकै रुखमा मृत भेटिएका हुन् । मृतक दुवैजनाको आफन्तले पहिचान गरेका छन् ।

घटनास्थल जाँचप्रकृति मुचुल्कापछि दुवैजनाको शव पोष्टमार्टका लागि प्रदेश अस्पतालमा पठाइएको सुर्खेत प्रहरीका प्रवक्ता डीएसपी मोहनजंग बुढथापाले जानकारी दिएका छन् ।

घटनाबारे थप अनुसन्धान जारी रहेको पनि उनले बताएका छन् । उनीहरू प्रेम सम्बन्धमा रहे नरहेकोबारे परिवारका सदस्यले केही खुलाएका छैनन् ।