काठमाडौं – नेपाल प्रिमियर लिग (एनपीएल) अन्तर्गत शनिबार जारी दोस्रो खेलमा विराटनगर किङ्सविरुद्ध पहिला ब्याटिङमा उत्रिएको काठमाडौं गुर्खाजले लगालग विकेट गुमाएको छ ।

यससँगै काठमाडौंको ब्याटिङ संकटतिर धकेलिएको छ । ओपनरसहित दुई ब्याटर दोहोरो रन नबनाइ आउट भएका छन् । खेल ४ ओभरको पहिलो बलमा पुग्दा काठमाडौं ३ विकेटको क्षतिमा १३ रनको संकटपूर्ण अवस्थामा छ ।

तेस्रो विकेटका रुपमा प्रतीक श्रेष्ठ आउट भएका हुन । उनले ६ बलमा २ रन जोडे ।

उनलाई विराटनगरका मर्चेन्ट डे लाङ्गेले लोकश बममार्फत् क्याच आउट गराएका हुन् । मर्चेन्टकै बलमा काठमाडौंका ओपनर आकाश त्रिपाठी पहिलो ओभरको पाँचौ बलमा रनको खाता नखोली आउट भए ।

पाँच बल सामना गरेका आकाश कप्तान सन्दीप लामिछानेमार्फत् क्याच आउट भएका हुन् । खेल २ ओभरको २ बलमा पुग्दा काठमाडौंले दोस्रो विकेटका रुपमा रिकार्डो भास्कोन्सेलोसलाई गुमाएको हो ।

४ बलमा ३ रन जोड्दै उनी रन आउट भए । उनी आउट हुँदा काठमाडौं २ विकेटको क्षतिमा ७ रनको अवस्थामा पुगेको थियो । विराटनगरको कसिलो बलिङले काठमाडौंका ब्याटरहरु दबाबमा परेका छन् ।