काठमाडौं- नेकपा (एमाले)का अध्यक्ष केपी शर्मा ओलीले ११औँ महाधिवेशनलाई एकताको महाधिवेशन बनाउन आग्रह गरेका छन्।

बिहीबार पार्टी कार्यालय च्यासलमा बसेको सचिवालय बैठकमा उनले पार्टी पंक्ति र देशले एकताको महाधिवेशन चाहेको धारणा राखेका हुन्।

‘कसैले प्रतिस्पर्धा गर्नुहुन्छ भने पनि स्वस्थ प्रतिस्पर्धा गर्न सकिन्छ भन्ने कुरा बैठकमा छलफल भएको छ,’ उपमहासचिव प्रदीप ज्ञवालीले भने।

उनका अनुसार, ओलीले प्रतिस्पर्धामा पराजित भएपछि पार्टी छाड्ने गरेको बताएका थिए। उनले आफू भने आठौँ महाधिवेशनमा पराजित भए पनि पार्टी एकताका लागि लागेको र माधव नेपाल, भीम रावलसहितका नेताले पार्टी छोडेको बताएका थिए।

‘माधव नेपाल, भीम रावलजस्तो स्थिति नबनोस्। स्वस्थ प्रतिस्पर्धा गरौँ। त्यसले फरक पार्दैन। तर, आन्दोलनको आवश्यकता सहकार्यका साथ अघि बढ्ने हो भन्ने कुरा व्यक्त गर्नुभयो,’ ज्ञवालीले भने।

आजको बैठकमा वरिष्ठ उपाध्यक्ष ईश्वर पोखरेलले आफू अध्यक्ष पदमा उम्मेदवार हुने जानकारी गराएका थिए। ओलीले उनलाई उक्त निर्णय परिवर्तन गर्न पनि आग्रह गरे।