कलैया, बारा– सिमरा विमानस्थल र जीतपुर सिमरा आसपास क्षेत्रमा जेन-जी युवाहरूले गरेको प्रदर्शन उग्र बनेको छ । उनीहरूले गरेको प्रदर्शनका कारण दोस्रो दिन बिहीबार पनि जिल्ला प्रशासन कार्यालयले कर्फ्यू आदेश जारी गरेको छ ।

सम्भावित जनधनको क्षति हुन नदिन भन्दै जिल्ला प्रशासन कार्यालय बाराले बिहीबार दिउँसो १ बजेदेखि बेलुका ८ बजेसम्मका लागि कर्फ्यू आदेश जारी गरेको हो।

तर उक्त कर्फ्यूको प्रभाव देखिएको छैन । सिमरामा तनाव बढ्दै गएको छ। कर्फ्यू अवज्ञा गर्दै प्रदर्शन भइरहेको छ। जेन-जीका नाममा भएको प्रदर्शनका क्रममा प्रहरीले ६ सेल अश्रुग्यास र २ राउन्ड हवाई फायर गरेको छ। प्रहरीमाथि पनि प्रदर्शनकारीले व्यापक ढुंगामुढा गरेका छन् ।

यस क्रममा ४ जना जेन-जी र ६ जना प्रहरी घाइते भएका छन् । सिमरा चोकबाट प्रदर्शनकारी युवाहरूको एक समूह विमानस्थलतर्फ अगाडि बढ्न खोजेपछि स्थानीयबासी रोकेका छन् ।

उता सिमरा बजारस्थित प्रहरीको बिट पनि जेन-जी प्रदर्शनकारीहरूले जलाइदिएका छन् । उता एमाले कार्यालयका सामान बाहिर निकालेर जलाइएको छ।

एमालेका कार्यकर्ताहरूलाई प्रहरीले पक्राउ गर्न आलटाल गरेको आरोपसहित जेन-जीका नाममा भएको प्रदर्शन विध्वंशक भएको हो ।

उता जेन-जी बाराका संयाेजक भनिएका सम्राट उपाध्यायलाई टेलिफोन गरी प्रमुख जिल्ला अधिकारी धर्मेन्द्र मिश्रले संवादबाटै समस्याको समाधान गर्नुपर्ने भन्दै वार्तामा बोलाएका छन् ।