काठमाडौं- बलिउड चलचित्र उद्योगमा ड्रग्स केसको विषय अहिले निकै चर्चामा छ । धेरै सेलिब्रेटीहरू यो केसमा संलग्न भएको आरोपमा परेका छन् ।

केही दिनअघि मुम्बई प्रहरीको एन्टी–नार्कोटिक्स सेलले दुबईमा बसेको ठानिने अण्डरवर्ल्ड डन दाउद इब्राहिमका साथी सलिम डोलाले सञ्चालन गर्दै आएको ठूलो ड्रग्स सिन्डिकेट पर्दाफाश गरेपछि पछिल्लो घटनाक्रम विकास भएको हो ।

दुबईबाट डिपोर्ट भई पक्राउ परेका मोहम्मद सलिम र मोहम्मद सुहैल साइकमाथि अनुसन्धान थालिएको छ ।

उनीहरुमाथि प्रभावशाली सेलिब्रेटी र बलिउड कलाकारहरूका लागि भव्य पार्टी आयोजना गर्ने ड्रग्स डिलरको आरोप छ ।

अनुसन्धान क्रममा साइकले अभिनेत्री तथा डान्सर नोरा फतेही, अभिनेत्री श्रद्धा कपूर र उनका भाइ सिद्धान्त कपूर, फिल्म निर्माता जोडी अब्बास–मस्तान, र्‍यापर लोका, सोशल मिडिया इन्फ्लुएन्सर ओरी र एनसीपी नेता जिशान सिद्दिकी लगायतका नाम समावेश गरेका थिए ।

मुम्बई प्रहरीले सोशल मिडिया इन्फ्लुएन्सर ओरीलाई बयानका लागि आज बिहिबार एन्टी–नार्कोटिक्स सेलमा उपस्थित हुन समन पठाएको छ ।

भारतीय मिडियाका अनुसार ओरीको बयानपछि मात्र अन्य सेलिब्रेटी र राजनीतिक व्यक्तिहरूलाई पनि सोधपुछ गर्नुपर्ने हो कि होइन भन्ने निर्णय हुनेछ ।

यसअघि यसै केसको छानबिनका क्रममा अभिनेत्री तथा डान्सर नोरा फतेहीको नाम पनि बाहिरिएको थियो ।

लामो मौनता तोड्दै नोराले आफ्नो सोशल मिडिया पोस्टमार्फत आफू यस्ता पार्टीमा कहिल्यै सहभागी नभएको बताउँदै आरोपलाई पूर्ण रूपमा अस्वीकार गरेकी छन् ।