काठमाडौं- बाराको सिमरामा बुधबार कर्फ्यू लगाउनु पर्ने तनावपूर्ण अवस्थालाई लिएर आरोप-प्रत्यारोप भइरहेको छ ।

नेकपा एमालेले बाराको परवानीपुरमा गर्न लागेको कार्यक्रमलाई जेन-जीको नाममा एउटा समूहले अवरोध गर्न खोजेको आरोप लागेको छ।

अर्कातिर आफूलाई जेन-जीका रुपमा चिनाउनेहरूले यो तनावको मुख्य कारण नै एमाले भएको जिकिर गरेको छ।

आफूलई जेन-जीको मधेस प्रदेश संयोजकका रुपमा चिनाएका शिव यादवले एमालेको कार्यक्रममा कुनै अवरोध नगरेको र गर्ने मनासय नरहेको पनि बताएका छन् ।

बुधबार सिमरा चोकमा जेन-जीको कार्यक्रम तय गरिएको थियो । यो कार्यक्रममा एमालेका कार्यकर्ता परिचालित गरेर बिथोल्न खोजिएको उनले दाबी गरे । जेन-जी बारा संयोजक सम्राट उपाध्यायसहितलाई एमाले कार्यकर्ताले कुटपिट गरेको उनले जिकिर गरे ।

उता एमालेले परवानीपुरमा कार्यक्रम राखेको थियो । एमालेका कार्यकर्ता सिमरामा आएर जेन-जीहरूको अपमान, दुर्व्यवहार र कुटपिट गरेको उनले बताए ।

‘एमालेबाटै आक्रमण भएको स्पष्ट छ,’ उनले भने, ‘गलत सूचना गइरहेको छ। यो सूचनाले जेन-जी आन्दोलनलाई बदनाम गर्न खोजिएको छ ।’

उनले एमालेका कार्यकर्ताहरूलाई पक्राउ गरी कानुनी कारबाही हुनुपर्ने बताए । ‘आजको घटनाका मुख्य योजनाकार महेश बस्नेतलाई मधेस निषेधको व्यवस्था मिलाउन सरकारसँग माग गर्दछु’, उनले भने ।