दाङ – दाङको तुलसीपुर उपमहानगरपालिका–१६ स्थित ग्वारखोला किनारमा निर्माण गर्ने भनिएको औद्योगिक ग्रामको काम अघि बढ्न सकेको छैन । हाल पर्खाल लगाउने काम मात्रै भएको छ ।

उपमहानगरपालिका प्रमुख टीकाराम खड्काले हाल जग्गा संरक्षणका लागि पर्खाल लगाउने काम भएको र केही समयमा टहरा निर्माण गरिने बताए । टहरा निर्माणपछि खानेपानी, विद्युत्लगायत सुविधा उपलब्ध गराएपछि व्यवसायीहरु बस्न सहज हुने उनको भनाइ छ ।

औद्योगिक ग्रामका लागि चालु आर्थिक वर्षमा रु २५ लाख बजेट विनियोजन भएको छ । तुलसीपुर उपमहानगरपालिकाले अघिल्लो कार्यकालमै सोही ठाउँमा औद्योगिक ग्राम निर्माणका लागि कार्यपालिकाबाट निर्णय गरेको थियो ।

साना तथा मझौला उद्योगलाई प्रवर्द्धन गर्न सोही स्थानमा औद्योगिक ग्राम बनाउने गरी छनोट गरिएको छ । त्यहाँको करिब २५ बिघा जग्गामा औद्योगिक ग्राम निर्माण गर्न लागिएको हो ।