काठमाडौं – कात्तिक १४ देखि २९ गतेको अवधिमा हलहरुमा दर्शकको उपस्थिति राम्रो देखिएको छ ।

उक्त मितिमा प्रदर्शनमा आएको फिल्म ‘परान’, कात्तिक २१ बाट प्रदर्शनमा आएका दुई फिल्म ‘जारी २’ र ‘मन बिनाको धन’ धन हेर्न दर्शकहरु उल्लेखनीय संख्यामा हलमा पुगेका हुन् ।

१५ प्रदर्शन दिनको अवधिमा यी तीन फिल्म हेर्न देशभरका हलहरुमा ६ लाख ३४ जना दर्शक चलचित्र विकास बोर्डको तथ्यांकमा देखिन्छ । उक्त संख्याको दर्शक हलमा पुग्दा १७ करोड २२ लाख ५३ हजार बराबरको टिकट बिक्री भएको छ ।

‘परान’ हेर्न तीन लाख ४७ हजार १७५ दर्शक हलमा पुगेका छन् । यस फिल्मको ग्रस कलेक्सन ९ करोड ८६ लाख ९४ हजार छ ।

त्यस्तै, ४ करोड ९२ लाख ग्रस कलेक्सन गरेको फिल्म ‘जारी २’ हेर्न एक लाख ६२ हजार ३३३ वटा टिकट बिक्री भएको छ ।

‘मन बिनाको धन’ले भने कम दर्शकको साथ पाएको छ । दुई करोड ४३ लाख ग्रस कलेक्सन गरेको यस फिल्म हेर्न ९० हजार ५२६ दर्शक मात्रै हलमा पुगेका छन् ।

दीपक आचार्य निर्देशित फिल्ममा नीर शाह शीर्ष भूमिकामा छन् ।

नायकहरु दयाहाङ राई, विजय बराल र नायिका मिरुना मगर शीर्ष भूमिमामा रहेको ‘जारी २’ लेखक तथा निर्देशक उपेन्द्र सुब्बा हुन् ।

बाल गायक अशोक दर्जीको जीवनीबाट प्रेरित कथामा बनेको ‘मन बिनाको धन’को शीर्ष कलाकार उनी नै हुन् । गायक तथा संगीतकार टंक बुढाथोकीले यही फिल्मबाट निर्देशनमा डेब्यू गरेका हुन् ।